mercredi 6 février 2008

أعصابك يا معلّم

الصولد بدا نهار الجمعة، قلت نمشي أول نهار نشوف نلقاشي روكروتمون باهي ناخذو. لكن هَيْهات!! اللّي بيه الفايدة وفى من غادي لغادي. و رغم هذاكة فمّا شكون مازال عندو أمل بش يطيح بدجين ما شافو حد ولاّ مريول من تحت الأكداس.
و تلحم عاد ضرب بونية و خطفان تقولش عليها العباد ما عندها ما تلبس...
خلّي عاد اللي عندو الزهر ولقى حاجة يحب يقيسها. يمشي يشد الصف: فمّا اللي يدخلو بالزوز فرد وقت و فمّا اللي يستنى البرّة و فرد مرة يشطحلنا شويّة تكتونيك... حقيقةً جوّ ولا في الأحلام! وكيما يقولو جماعة كلام الليل "بابور داخل، بابور خارج..." صعيب ياسر كان واحد يقلق.

الكوب دافريك
يقول القايل: شنيّة العلاقة بين الكوب دافريك و الصولد؟
ساهلة ياسر، جماعة جيان كلمو إيتو بش يسيّب ’مبيا‘ على جوارات تونس... الراجل وين يطلع يمركي بونتو بالراس و الجماعة خافو لا حكاية التلافز تطلعلهم قرعة!
ملاعبية المنتخب يعاندو في المصاروَة بعد ما يمركيو بونتو، ما فيبالهمش اللي الفايدة في اللي قبل البونتو موش بعدو!
هاذوما و متاع الجامعة نقولولهم كيما قال العرجون للمصري اللي طلع في التلفزة و قال "... بس أنا فهمتها".
برشة قيل و قال في هالبوست، أمّا لو كان يهبطوني ناكلو لومار!
آخر قولة اليوم: كانت حالّة معاك، ولاّت ماشية و تبَيْبي!
و يوفى الحديث!

4 commentaires:

Anonyme a dit…

فسر المفردات التالية:
روكروتمون
مريول
لومار
:D

medjri a dit…
Ce commentaire a été supprimé par l'auteur.
medjri a dit…

يا للّة بش تفهم اللي كتبتو ، يلزمك تكون متابعة شويّةأخبار الكورة في تونس
أما اللهجة واضحة نتصور:)
روكروتمون=recrutement
مريول = maillot (tee-shirt)
لومار=Lemerre= sélectionneur de l'équipe nationale
عندك الحق في الأولى برك صعيبة
:P

Anonyme a dit…

J'avais deviné pour le premier, mais je n'ai pas tout à fait saisi le contexte, donc je l'ai mis en doute.
Pour meryoul, j'avais aucune idée.
Et Lemerre, euh, j'aime pas trop le foot. :D