مساجات المناسبات، ياسر تخلويض

هاذي أول مرة بش نبلوڨي(نكتب) بالتونسي. هاو ولاّت ألامود الحكاية.ر
لا علينا، حبيت نحكي على المساجات اللي يتبعثوا في المناسبات: بالله واحد يبعث نفس المساج لربرتوار كامل، شمعناها؟ شنيّة بش يربح؟ تي ويني الإضافة، قال الراجل؟
ولاّ خلي مالمساجات اللي تتعاود كل عام و في المناسبات الكل! كلّو على بعضو! قال شنوّة يبعث من غير ما يڨمّر: عليك ولاّ عالبيس! توّة في عيد يا رسول اللّه يبعثلك مساج: نتمنالك السعادة و الحب و السرور و الطقس جميل و العصافير تزقزق... لواه؟ بالكشي راس عام هو؟
يعطيك الصحة عالمساج، أوكي. أمّا يا خويا كي ماتفرقش، أرتاح!ر

آنا واحد مالناس يا ما فيها لا نبعث لا نجاوب، يا ما فيها نبرسوناليزي مساجاتي بش نعمل جو و نبدى شايخ آنا و اللي نبعثلو... مالا باش عيد هو!؟
و التوانسة بطبيعتهم ضامرين، حاسيلو نشبعو ضحك في الاخر!!ر

توة العيد تعدى، نشاالله في راس العام يجيونا مساجات جدد، برسوناليزي و ضامرين موش ’ميل كولومب تامان... درى شنوّة‘ ولاّ مساج باللبناني!!ر
هيّا أنا صرفت صرفت، خنقول راني فرحان اللي هذا أول بوست على تونيبلوڨ، سنين دايمة و ربي يحيينا لأمثاله!ر